اس سال دنیا کا طویل ترین روزہ کتنے گھنٹے اور کس ملک کا ہوگا؟

اس سال ایک ملک ایسا بھی ہے جس کے مسلمان دنیا کا طویل ترین روزہ رکھیں گے۔ لیکن یہ روزہ کتنے گھنٹے کا ہوگا؟

دنیا کا طویل ترین روزہ گرین لینڈ کے مسلمان رکھیں گے جس کا دورانیہ 21 گھنٹے 2 منٹ ہوگا، ماہ صیام کی آمد آمد ہے اور دنیا کے کئی ممالک میں 17 مئی سے رمضان المبارک کا مہینہ شروع ہورہا ہے۔

رمضان المبارک میں مسلمان خصوصی عبادات کا اہتمام کریں گے اور دنیا کے ایک کونے سے دوسرے کونے میں بسنے والے مسلمان کئی کئی گھنٹے روزے کی حالت میں گزاریں گے۔

گرین لینڈ کے بعد آئس لینڈ میں 21 گھنٹے ، فن لینڈ میں 19 گھنٹے 56 منٹ، ناروے اور سوئیڈن میں 19 گھنٹے طویل روزہ ہوگا۔

روس، جرمنی، آئرلینڈ، برطانیہ، بیلجیئم اور دیگر یورپی ملکوں میں مسلمان 18 گھنٹے بعد افطار کریں گے، جب کہ کینیڈا میں 17 گھنٹے 24 منٹ اور امریکا میں 16 گھنٹے 29 منٹ کے بعد روزہ افطار کیا جائے گا۔

ایران میں 16 گھنٹے 04 منٹ، افغانستان میں 15 گھنٹے 51 منٹ، بھارت میں 15 گھنٹے 2 منٹ اور پاکستان میں 15 گھنٹے کا روزہ ہوگا ۔

سعودی عرب میں 14 گھنٹے 41 منٹ، انڈونیشیا میں 13 گھنٹے 02 منٹ، آسٹریلیا اور نیوزی لینڈ میں 11 گھنٹے 40 منٹ سے زائد دورانیے کا روزہ ہوگا تاہم سب سے کم دورانیے کا روزہ ارجنٹائن میں 11 گھنٹے 32 منٹ کا ہوگا ۔